By 
قال مختار الشمّيس جورج قزي في لقاء لمخاتير #اقليم_الخروب في دارته خلال لقاء لائحة “الشراكة والارادة”: بالبداية، برحّب فيكن كلكن ببلدتكن الزغيرة عين الاسد الشميس، اللي بتتوسط اقليم الخروب، تماماً متل ما القلب بيتوسّط كل جسم.هيدي البلدة المتواضعة هي مثال للعيش المشترك ، لكل الاديان و لكل المشارب ، و لكل الميول و الاهواء .هيدي البلدة الزغيري، واللي كانت أزغر بسكانا قبل السبعينات، قام بزيارتا مُفكر كبير اسمو كمال بك جنبلاط ، وبعدنا لليوم منذكر سعيو وانجازو بتزويد هالضيعة بشبكة الكهربا وتزفيت طرقاتا ، فرحمة الله على روحو .اما بعد ما نتهت الحرب الأهلية المشؤومة ، زار هالضيعة الزغيري ، وبالتحديد سنة ٢٠٠٤ ، مناضل عريق اسمو وليد بك حنبلاط، وكانت اول زيارة لإلو ، وهيي بمناسبة تقديم التعازي بوفاة والدي المرحوم الياس القزي .اما اليوم، فعم بيزور هالضيعة ، وعلى خُطى جدّو و بيّو ، الله يطول بعمرو، شب صاعد اسمو تيمور بك جنبلاط، فأهلا وسهلا فيك استاذ تيمور وبكل اعضاء اللقاء الديمقراطي وبكل المرشحين.
اما في ما خص مرشحي القوات اللبنانية وأخص بالذكر الاستاذ جورج عدوان، فشهادتي فيكن مجروحة، وانا وياكن منحمل نفس القلب ونفس الشعور ونفس التطلعات، فأهلا وسهلا فيكن يا رفاق.
اما بالنسبة للمخاتير ( على فكرة، شحيم فيها ١٣ مختار وهنّي بيعتبروني المختار ال ١٤ معن ، انا بشكرن على ثقتهن فيي )زملائي مخاتير اقليم الخروب بالاجماع ، بشكر حضوركن و تلبيتكن هيدي الدعوة ، كمان شهادتي فيكن مجروحة لأنو جرحي من جرحكن وفرحي من فرحكن ومعاناتي من معاناتكن، وانا بدعيكن وبتمنّى عليكن نكون ايد وحدة “بكل شي” ، وبأكد على عبارة “بكل شي” ، تا نتبادل الآراء ونطوّر الافكار ونجدّد العزم ونتعاون بمختلف الأصعدي والامور ، خاصة بهيدي المرحلة الانتخابية ، مطلوب منا جهد و عمل كبير ، مطلوب منا نشجّع اهلنا و ناسنا و حثّهن على ممارسة حقهن الانتخابي، و اكيد التصويت لمرشحي لائحة الشراكة و الارادة ، يلي بجسّدو فكر كل مختار موجود بيناتنا، و يلي “هني بدّون و هني فيهن” بدّون و فيهن يبنوا بلد و يحافظوا على كيانو و مؤسساتو و شعبو و الاهم يحافظوا عالسلم الاهلي و العيش المشترك .
وقبل ما انهي كلمتي، ما فيي الا ما وجّه تحية من القلب لكاهن رعيتي الاب جوزف القزي ، يللي على طول حاضر وبكل المناسبات لانجاح اي عمل خيري او ديني او وطني .اهلا و سهلا بالجميع شرفتونا ونورتونا
